Phone: +250 788315140 Email: info@rwamrec.org

HeForShe ni igikorwa cy’ubukangurambaga kigamije guteza imbere uburinganire n’ubwuzuzanye cyatangijwe n’ishami ry’umuryango w’abibumbye ryita ku iterambere ry’abagore (UN Women). Ubu bukangurambaga bugamije guhindura abagabo n’abasore umusemburo mwiza uzatuma uburinganire n’ubwuzuzanye bigerwaho kandi bakanakangurirwa kugira uruhare mu gukuraho ibitera ubusumbane hagati y’abagabo n’abagore.
Kuberako ubusumbane hagati y’abagore n’abagabo butera ingaruka mbi ku bagagize umuryango bose (abagore, abagabo n’abana), iki gikorwa cy’ubukangurambaga kigamije guha umwanya abagabo nabo ngo bagire uruhare mu bikorwa byari bisanzwe bifatwa nk’aho bireba abagore gusa. Igihe kirageze ngo abagabo nabo basobanukirwe icyo bakora ngo bashyigikire uburenganzira bw’abagore maze banabashe kuryoherwa n’ibyiza byo kongerera ubushobozi abagore.
Perezida wa Repubulika y’u Rwanda, Nyakubahwa Paul Kagame ni umwe mu bayobozi 10 b’ibihugu batoranyijwe kuba icyitegrerezo mu guteza imbere uburinganire n’ubwuzuzanye.
Ku wa gatanu tariki ya 18 Nzeri 2015, Minisiteri ifite uburinganire mu nshingano zayo yateguye igikorwa cyo gutangiza ku mugaragaro igikorwa cy’ubukangurambaga cya HeforShe ku rwego rw’igihugu. Iki gikorwa cyari gikuriwe na Nyakubahwa Bernard Makuza, Perezida w’umutwe wa Sena.

Nyakubahwa Bernard MAKUZA wari ukuriye igikorwa cyo gutangiza ku mugaragaro igikorwa cy’ubukangurambaga cya HeForShe mu Rwanda.

RWAMREC nk’umuryango ufite ibikorwa bigamije guteza imbere uburinganire n’ubwuzuzanye mu Rwanda yagize uruhare runini mu bikorwa byo gutangiza ubu bukangurambaga mu Rwanda. Abagabo bagera kuri 60 biyemeje kugira uruhare mu buringanire babitojwe na RWAMREC bari bitabiriye iki gikorwa.

Abagabo bahuguwe na RWAMREC bitabiriye ibirori byo gutangiza ku mugaragaro ubukangurambaga bwa HeforShe ku rwego rw’igihugu.

Umunyamabanga Nshwingwabikorwa wa RWAMREC, Bwana Munyamaliza Edouard ageza ijambo ku bitabiriye.

Nyakubahwa Bernard MAKUZA amurikirwa bimwe mu bikorwa bya RWAMREC

Ntibimenya Hassan na Mukakimonyo Hassina batojwe na RWAMREC uburinganire n’ubwuzuzanye. Batanze ubuhamya bw’ukuntu uwo bitaga ‘intare’ yahindutse akaba umugabo w’icyitegererezo mu guteza imbere uburinganire n’ubwuzuzanye mu muryango we no mu baturanyi